CG Crime News : 20 लीटर महुआ शराब के संग आरोपी धरईस, बाइक घलो जब्त, बसना पुलिस के तगड़ा कार्रवाई, 64 हजार के माल बरामद

 

20 लीटर महुआ शराब के संग आरोपी धरईस, बाइक घलो जब्त, बसना पुलिस के तगड़ा कार्रवाई, 64 हजार के माल बरामद

बसना। अवैध शराब के खिलाफ बसना पुलिस ह एक बार फेर जोरदार कार्रवाई करत 20 लीटर हाथभट्ठी के महुआ शराब के संग एक आरोपी ला धर दबोचे हे। पुलिस ह आरोपी के कब्जा ले शराब बरामद करे के साथे शराब परिवहन मं उपयोग होवत मोटरसाइकिल घलो जब्त करे हे। जब्त सामान के कुल कीमत करीब 64 हजार रुपिया बताय गे हे।

पुलिस ले मिले जानकारी के मुताबिक, 7 अक्टूबर के टाउन पेट्रोलिंग के बेरा मुखबिर ले सूचना मिलिस कि ग्राम जीराडबरी ले सावित्रीपुर-जर्रा रोड मं नीम पेड़ के पास एक आदमी अवैध महुआ शराब रखे हवय। सूचना मिलतेच बसना थाना के पुलिस टीम गवाह मन के संग मौका मं पहुंचिस अउ घेराबंदी करके एक संदिग्ध ला पकड़िस।

पुछताछ मं आरोपी ह अपन नाम चंद्रशेखर सिदार (32 साल), निवासी ग्राम जर्रा, थाना बसना बताइस। तलाशी ले ओकर कब्जा मं 20 लीटर क्षमता के प्लास्टिक जरकीन मं भरे करीब 20 लीटर महुआ शराब बरामद होइस, जेकर कीमत करीब 4 हजार रुपिया आंके  गे हे।

पुलिस ह घटना मं इस्तेमाल होवत हीरो एचएफ डीलक्स मोटरसाइकिल क्रमांक CG 06 GY 3416 ला घलो जब्त करे हे, जेकर कीमत करीब 60 हजार रुपिया बताय गे हे। कुल मिलाके पुलिस ह 64 हजार रुपिया के मशरूका जब्त करे हे।

पुलिस के मुताबिक, पूछताछ के दौरान आरोपी ह शराब के सप्लाई के संबंध मं सावित्रीपुर निवासी आशा राम रात्रे के नाम बताए हे। पुलिस ह अब शराब के सप्लाई के स्रोत अउ पूरा नेटवर्क के संबंध मं जांच-पड़ताल शुरू कर दे हे।

बसना पुलिस ह आरोपी चंद्रशेखर सिदार के खिलाफ छत्तीसगढ़ आबकारी अधिनियम के धारा 34(2) के तहत अपराध दर्ज करके गिरफ्तार कर ले हे। मामले मं आगे के विवेचना जारी हे।